Dabiib

Dadkuu Rabbi uumay ee

Dunida guudkeeda suran

Kuwii lay dooray ee

Nolosha dacalkayga yimi

Waxaa door ii xigoo

Xaggooda u soo durkaa

Kuwuu wakhti doorriyee

Dabaylaha quusta sida

Cidlada kula doobbiyeen! 

Duruufaha ruux ildaran

Si baan ugu diirnaxaa

Si baan u dawee iraa

Si baan dugsi lagu hirtiyo

Jacayl nafta doojiyiyo

Dabiib ula raadsadaa

Dantuba qofka ay i muddo

Daqiiqadda uu i rabo

Inaan dayacaan necbahay

In aan diif iyo culays

Ku daayana waan karhaa!