Sabaalo!

Suugaan sideeduba

Sahal lagu ma curiyee

Sabab bay ku dhalataa

Sahankiyo hayaankuna

Sibiq reerka kuma galo

Qorshe seeto dheeroo

Caqli lagu sirkaxayoo

La sugaayay weeyaan

Ruuxii wax saadshaa

Si walbuu ku doonana

Calaf saacidaayiyo

Qaddar sii dhignaydiba

Haddii ay u sacab furin

Sina ku ma haleeloo

Isha saari kari waa

Anigoon sinbiririxan

Tiraabtuna dul saarnaan

Tixna aan ku sibibixan

Waxaan uga socdaa iyo

Siinleyda maansada

Saldhiggeeda aan furo

Oon solo ujeeddada

Dunidani sagaalkee

Noqonaynba tiro sugan

Sammadiyo cirkeediyo

Aadmiga dul saarani

Hanku waa u seetoo

Doonistaaba lagu saday

Aniguna su'aalaha

Ka ma seexdo ruuxdoo

Wax uun baan siraadshaa!

"Himilada la sara joog. 

Ii sawir bal waayahay. 

Calafkayga solan iyo

Ruuxaan sugaayaa

Siduu noqoni doonaa? 

Ma sidaan la doonay

Ku socdaan amuuraha? 

Ma sadkaygi baan heli? 

Mise soomanaha guud

Ayunbuu socdaalkiyo

Ku sal go'i adduunyada? 

Suuree maxaa xigi

Xaalkaan ku suganahay? 

Sidaa iyo sidaa iyo

Ma sidaan jeclaabaa?" 

Weydiimahaa saxan

Iyo qaar saluugani

Waa kuwa saqdii dhexe

Kolka uunku seexdaa

Nafta soo direysee

Sarajooga igu hela! 

Anna maba saluugee

Sumad iyo jawaabiyo

Sabaalaha danbeetiyo

Rejo aan sugnayn iyo

Talo saaro Rabbigaa

Ku seexshaa qalbiga oo

Sareediyo wanaagiyo

Khayrka soo socdaa baan

Ku sabaa halbowlaha!